الشاورمة السهلة السريعة

- الطريفة دى سهلة جدا تتعمل عالواقف ومش لازم أبيت الشاورمة فى
التتبيلة ولا حاجة وبتكون حلوة برضه

المكونات:
بصل-فلفل-بقدونس-طماطم-شرايح فراخ أولحمة متبلة بطريقتك-زيت
الطريقة:
- نقطع البصل والفلفل الرومى حلقات.
- نسخن طاسة فيها شوية زيت ونشوح الفلفل والبصل ونحطهم على جنب
نقطع البقدونس والطماطم نقطعها مكعبات ونحرص أن تكون جامدة وإحنا بنقطعها نحرص أن تكون خالية من البذور وأى سوايل ويمكن إستخدام السوايل دى فى تتبيل الشاورما
- نقطع قطع الفيليه شرائح طولية رفيعة معلهش أنا قطعتها تخينة شوية عشان كنت مستعجلة بس إنتم ماتبقوش تعملوا زيى.
- يتم التتبيل بطريقة بسيطة جدا باستخدام( توم مفروم-ملح-خل-بردقوش- بهارات فراخ – بابريكا) فقط لا غير
- وبالنسبة للحمة بنختارها لأما فلتو أو إنتركوت أو بفتيك عشان تستوى بسرعة وعلى فكرة أنا ممكن أستخدم بفتيك مجمد وبقطعه ترانشات رفيعة عكس إتجاه الأنسجة ويمكن إضافة لية مفرومة لو عندك والتتبيلة بسيطة جدا (توم مفروم –بهارات لحمة-قرفة-جنزبيل –خل)
- وبعدين نسخن طاسة فيها شوية زيت ونسخنها كويس جدا ونعلى عليها النار ولازم تكون الطاسة واسعة عشان تستوعب قطع الفراخ أو اللحمة على سطحها ماتكونش فوق بعض يعنى(بنستخدم الزيت فى الفراخ وما نستخدمهاش فى اللحمه عشان إحنا حاطين لية)
- وبعدين نرمى الفراخ أو اللحمة عليها عشان نقفل المسام لاحظى إن الفراخ أو اللحمة ما لحقتش يكون فيها أى سوايل (نصيحتى ليكم عن تجربة إنكم لوحتغيروا فى التتبيلة يعنى تحطوا زبادى مثلا أو ليمون وتركنوها شوية تصفوا الفراخ أو اللحمة كويس من مية التتبيلة قبل ما ترموها فى الطاسة )
- وبعدين نقلب كويس لحد ما الفراخ أو اللحمة لونها تتغير ونقلب لحد ما تشرب ميتها والله لو إستوت يكون خير وبركة مااستوتش نضيف شوية مية صغيرين أو نضيف الجزء المتبقى من مية التتبيلة بس بحرص لأننا عايزينها تكون زى ما بنشتريها يعنى خالية من السوايل
وبعدين نضيف البصل والفلفل المحجوزين ونقلب
وفى الأخر نضيف البقدونس والطماطم ونطفى النار

لا دى انا ممكن اكلها لانى بحبها شكرا يا ميسي اكلاتك كلها ابداع

هههههههههههه
طبعا دى معروفه
واسهل حاجه

هههههههههه
منا با\كلها كتير

[b]ماهى سهله اصلا

تصدقوا اني جعت

هههههههههههههه
هوده هدفى فى القسم ده
انى اجوعكووووووووووووووووووا

ليه كده يا ميسي
انتي مفروض
الشيف بتاعنا
يعني تاكلينا
وتشبعينا
ده احنا برضه تجارة سوا
يعني لو مشبعتش منك من اكلك
هاشبع من مين الشيف الشربيني مثلا

هو فيه احسن من الشيف شربينى برده
بس هجوعكوا هجوكوا

بجد اكله جميله وتشكرى عليهااااااااااا دا احنا بناكلها على طول فى راس البر

الشاورمة اللي هيا بيبقا حتة لحمة بتلف دي وفوقها طماطماية اه
هههههههههههه
دي حلوة اوي بموت فيها
مضيع ثروتي عليها هههههههههههه

شكرا علي الطريقة الجميلة

تحياتي